銅鑼灣老字號禮頓麵包餅店六月結業

老闆林錫欽面前的腿蛋包及餐蛋包都大大件，最少用一隻半蛋，食完保證飽肚。

餐蛋包老店賣鋪發達

銅鑼灣鋪價愈升愈有，在時代廣場鈄對面的勿地臣街二線位，近期亦紛紛以高呎價成交。於八三年在勿地臣街十二號「插旗」的禮頓麵包，一直經營至今， 憑着一個賣十二蚊的餐蛋包，朝朝有大班捧場客支持，人龍橫跨三個鋪位。生意雖然好到做唔切，但老闆林錫欽於上週四決定，以一億四千六百萬元高價賣鋪給英 皇，較購入價賺足一億三千二百二十萬！印印腳唔使憂的林錫欽，宣布於六月底結業，歎世界去也。



「老豆當初根本無諗過賣㗎，我想佢休息下，叫佢賣鋪，但一提起佢就扮聽唔到，完全無反應，望一望你就扮唔知行開。」禮頓麵包的太子女「阿妹」說。 ○八年金融海嘯後各國量化寬鬆印銀紙，樓價、鋪價起飛，開始有經紀着老闆林錫欽賣鋪，上門、打電話、寄信，樣樣齊，但林老闆不為所動。
伙記知老闆心意，亦非常識做，「一有經紀入嚟，我哋成班伙記會趕佢走，連麵包師傅都會走出嚟，大聲話佢哋：『賣咗間鋪咁我哋做乜呀？』老闆都無阻止我哋，只坐喺度微微嘴笑。」牙擦擦的伙記成哥，揮動着鑊鏟說。
本來不欲言休，但心有餘而力不足，二○一○年底，一直堅持親自沖泡奶茶的林老闆，由於多年站立，左邊膝蓋軟骨出現退化，開始隱隱作痛，甚至無法如常屈起。林老闆要看中醫做推拿，不得不將此重任委以員工阿珊，但仍每日坐在水吧旁監督，避免出錯。


麵團搓好後，會以人手分好一個個包，堆在長枱上，曾師傅正在製作的熱狗，是禮頓另一甚受歡迎之選。


朝朝早禮頓門外大排長龍，但員工手腳超快，顧客落單後不到一分鐘就有貨，可繼續趕返工。

膝痛難耐始賣鋪
自己難以「瞓身」開工，於是想增加人手，誰知生意太好，又輪到個個後生仔怕辛苦，耍手擰頭，「有人送咗兩日外賣就唔做，有人一嚟見工，見到條龍咁 長，仲即刻話唔做添﹗」一說起請人，本來臉上常常堆起笑容的林老闆，亦不禁皺起眉頭。由於無法增聘人手，禮頓於今年四月開始停售炒粉麵，減輕員工負擔。
此時利誘開始來，林老闆在九六年以一千三百多萬元購入此鋪位，在過去一年不斷被提價，由二○一○年的五千萬，升至如今的一億四千六百萬，林老闆態 度逐漸軟化，最後在多重原因下，終於決定賣鋪，先袋三千萬元訂金。其實幫他計計數，要賣一千一百萬個餐蛋包，即要做多三十年，才能湊足賣鋪此數，林老闆自 然識諗。
「唔捨得梗有啦，但無計喎，我人老做唔掂，伙記都好辛苦，又請唔到人，都係時候啦。」現年七十二歲的林錫欽，已一頭白髮，但中氣十足，語音未落，已沖好幾杯熱奶茶，氣定神閒。
林老闆未想過售後租回，這店與位於禮頓道的總店將於六月尾正式結業，賣完鋪林老闆有一億幾千萬，究竟有何歎世界大計？林老闆笑笑口聳聳肩，透露未有新搞作。「之後先諗啦！有乜好做？同黃師傅一齊做特首就最好﹗黃師傅，係咪呀？」風騷的林老闆大大聲對着麵包師傅說。
但做特首之前，林老闆打算先和家人去旅行輕鬆一下。過去幾十年日日開鋪，一家人只趁新年幾日假期去東南亞玩，所以今次打算去較遠的地方旅行，但一定不會返大陸，「大陸成日造假，連啲嘢都唔敢食。」林老闆說罷又哈哈大笑。


客如潮湧，店內員工甚有默契，極速賣包沖茶，無阻顧客趕返工。


黃生曾光顧禮頓買包，食過翻尋味，於前日帶同老婆仔女一齊試，站在門口食得津津有味。

朝朝大排長龍
禮頓除了招牌餐蛋包及各類港式包點外，還兼賣咖啡奶茶，甚至出前一丁和滷水雞髀雞翼等。每朝七點半開鋪，人龍八時許開始出現；在林老闆坐鎮指點 下，店內兩個員工再加太子女「阿妹」，只能以摩打手「夾包」，負責灶頭的成哥亦密密將煎好的餐肉蛋夾進甜餐包內，令熱辣辣的「鎮店之寶」餐蛋包可盡快交到 顧客手上。
「餐蛋包、熱奶茶少甜，我知，塊肉煎燶啲嘛。」成哥一見熟客已「自動波」，確保顧客於落柯打後一分鐘內完成任務。即使門外出現五米長龍，隊尾的顧客仍未擔心返工遲到，這樣密密做，每日竟耗用近千隻雞蛋。
禮頓的寫字樓客最多，平日單日生意額高達二萬五千；臨近新年特別旺場，生意額更可上望三萬。禮頓另有批發麵包予太平館等餐廳，未計這些收益，該店 每月單是零售生意額已超過六十四萬元。每天繁忙時段過後，林老闆便於下午一時左右離開，或約朋友食飯飲茶，或回到他○二年以八百一十萬元購入的跑馬地比華 利山豪宅歇歇，生活悠閒，足見賣包薄利多銷下仍能富貴。


老闆娘黃幗儀於禮頓總店坐鎮，兩公婆分頭行事。


位於禮頓道的總店鋪面較靜，門牌及裝修皆非常懷舊，風味十足。

白手興家創大業
現在朝朝「做唔停」的光景，林錫欽當年可說是「發夢都估唔到」。他十一歲與家姐由汕頭來港與母親團聚，讀過幾年小學，便到香港仔的米鋪打工，之後 又到麵包鋪學師、到茶餐廳學沖茶。十多年後已在上環一家麵包店當上大師傅，認識當時在麵包鋪打工的黃幗儀。二人當時正計劃成家立室，剛巧禮頓道一二二號的 麵包鋪招租，林錫欽便以月租七百五十元頂下，成為現時禮頓麵包總店。
這家麵包店於一九七三年開張，生意勉強過得去。「嗰時呢度附近係電車廠，旁邊好多垃圾車，好污糟邋遢㗎，有個喺附近做雜貨嘅走過嚟問我，『你有無 得做㗎？』當時真係好靜。」林錫欽說。後來旁邊的保良局向禮頓訂包，一日要千幾個，一星期做六日，生意額狂颷。站穩陣腳後，林老闆於一九八九年以廿五萬買 入此店後鋪做工場。而幾百呎的前鋪，由一家信託基金持有，林老闆無法與業主聯絡，至今仍然只能租用。
有趣的是，當銅鑼灣地鋪租金瘋漲之際，這前鋪的租金十多年仍然不變，維持一萬七千元，更於二○○三年沙士期間一度減價幾千蚊。根據地產經紀估計， 該鋪位月租市價應是五至八萬元。太子女「阿妹」猜測前鋪屬於先人遺產，透過信託基金收租，沒有根據市值調整鋪租，變相令禮頓這家老鋪可以極低價長租。而禮 頓亦的確好運，九四年時代廣場落成，原本只是工場的勿地臣街分店，亦開始人頭湧湧。九六年，勿地臣街分店業主移民，林錫欽於是以一千三百八十萬買下鋪位， 造七成按揭，分五年還款。當時林老闆無法想到，此八百呎鋪位，會於十多年後勁升十倍，成就創富傳奇。


每日下午七點半收鋪後，太子女「阿妹」會親自數錢，往往直到收鋪前一刻，仍有客人衝入來買包。


勿地臣街分店靠近時代廣場（箭嘴示），日日車水馬龍，甚至有的士司機趁仍未轉燈，落車買包，然後再上車走人，非常方便。

高薪留住老師傅


伙記落場最愛打打牌，連鄰鋪兄弟得記燒臘飯店員工阿達（中）亦來湊熱鬧，鄧師傅（左）表示可以打牌是留在禮頓的主要原因之一。

現時留在禮頓的員工，個個都是老臣子，兩個姓黃的麵包師傅及負責煎蛋的成哥，更是「開國元勳」。「通常做呢行，兩三年就會轉地方，但我中間出去做 過好多大餅店，最後又係返番嚟。」黃師傅曾經離開禮頓，到過聖安娜、超群等大集團打工，最後仍然情歸禮頓。「點解？唔知呢，老闆好囉。」黃師傅想了一會兒 答道。
真唔知？無理由。「打工仔最想要乜，大家好清楚啦，唔使多講。老闆唔會孤寒，你明㗎啦。」成哥向記者打打眼色說。咁有幾唔孤寒？「嘩﹗私人嘢唔會講，總之你知道好就得啦﹗」成哥說罷立即掉頭走到灶前煎蛋去。
後來太子女「阿妹」透露，原來林老闆好「疏爽」，準時出糧之餘，每年會出十四至十五個月人工，另外再根據員工表現打賞花紅，最多會有四至五萬元， 報酬絕對好，難怪員工日捱夜捱仍心甘命抵。而且員工還可自由「自我調節」，採訪當日適逢佛誕，少了寫字樓客，於是三個麵包師傅便拿出啤牌，在搓麵粉的大枱 上玩「十三張」。林老闆雙眼瞇起，咧着嘴笑：「伙記鍾意打牌咪一齊玩囉，我無所謂，一齊打牌好開心。」「十三張」是禮頓的工餘活動，老闆經常參與。「試過 夜晚落場打牌，一直打到天光，然後直接開工﹗」曾於麵包廊任職主任的鄧師傅說，他在禮頓一待便是七年，可以輕鬆打牌，是他留在禮頓的重要原因之一。

多名人捧場客
禮頓多熟客仔，很多客人即使搬出區外，都會趁假期返禮頓買包。成哥說：「原來梁振英老婆係熟客我都唔知﹗佢以前一個月會嚟一次，後來梁振英選特 首，成日同老婆上電視，我先知道嗰個係佢﹗」收銀阿姐群姐笑着說：「伍姑娘（伍詠薇）都成日打電話落嚟叫我哋留兩個腸仔包，轉頭過嚟攞，佢驚賣晒無得 食。」
有無影相留念？「老細話千祈唔好搞啲咁嘅嘢，仲嫌唔夠好生意呀？整多幾幅相喺出面咪仲多人嚟？做死伙記﹗」成哥碌大雙眼大聲說。

禮頓的熟客不只幫襯買麵包，更會在必要時拔刀相助。四年前，太子女如常開鋪，卻發現久經風霜的大閘彈弓已經報銷，無法拉起大閘，但維修工人仍未開工。員工 正感徬徨，當時兩個於利舞臺 California Fitness任職健身教練的大隻佬熟客，正想去禮頓買包，見狀立即合力抬起重甸甸的大閘，用鐵棍頂着，令大閘可勉強保持半開狀態。員工索性入鋪將客人要 的麵包茶水遞到門外，太子女則站在門外交貨收錢，繼續營業。
人人都怕無生意，惟獨禮頓怕多生意。「你篇嘢唔好咁快出，最好六月尾（禮頓結業）先出，上次《飲食男女》一出，條龍排到過隔籬街，如果人人都知我 哋唔做，肯定仲多人，做到人都癲﹗」「阿妹」激動地說，老闆娘黃幗儀亦不甘示弱對記者說：「早過六月出（報導），你要日日嚟幫手賣包﹗」


週日鋪面較靜，林老闆親自下廚，弄了梅菜蒸鯇魚，清炒油麥菜與員工一齊食午飯。（鄧詠筠攝）


林老闆於○二年，以八百一十萬購入比華利山單位。

走下一間,走下又一間,銅鑼灣究竟會變成點樣?

http://forum5.hkgolden.com/view.aspx?message=3704743&highlight_id=126935


請記得去我地既FACEBOOK留言/讚好:https://www.facebook.com/justanotherstorehk
你身邊又有哪些小舖/小店想介紹?