「報告!報告!我地多年前築起,保衛灣仔同銅鑼灣,用黎分隔名牌巨舖同平民既寡均牆,今日被超級名牌巨舖LV於銅鑼灣衝破缺口,以巨額租金拳頭,揮低守護著時代廣場過十載,同時代同日開幕既UA戲院!UA戲院退守樓上,原先既食通天餐廳群就要全數徹離!雖然金百利,地帶同東角駅三巨頭仍未受衝擊,但亦反抗乏力,如果情況繼續惡化,CBD一帶只有灣仔同旺角仲有我地平民立錐之地!而同時灣仔已被包圍,情況堪虞!」
「報告!中環名店租界聯同尖沙咀廣東道名店租界.已通過立下禁例,禁止港人駐足,屆時唔單止影相,連行入去都唔可以!」
「報告!以金鐘為基地,生產各種汽水既大吉企業,近日同三大超市聯手,劃一汽水售價,各小商戶若有不從,將與人言屋同一命運,不再供貨!」
「大事休矣!唔通响CBD之內,真係冇平民可以進駐既舖頭?唔通我地就只可以响邊陲地方賣我地想賣既產品,任得呢啲外族品牌肆意响我地既地方指手劃腳,干涉我地內政?唔通我地想以蔗渣既價錢,租到燒鵝既舖位,就好似毒男想响情人節搵女仔陪出街一樣咁痴心妄想?」
當戲院搬到樓上,讓路給名牌,我們是否只有在樓上,才能找到名牌主義以外的生活?
當自由行貢獻無數既金錢黎香港血拼時,同時亦對香港店舖生態構成影響
你可能會覺得以上故事只係FF(幻想)橋段,但你睇返近日既新聞,遠由D&G唔比港人影相,到時代廣場UA搬遷,你有冇一時三刻感到呢股加租海嘯已經淹沒左好多小舖頭,尤其CBD一帶既舖頭生態,已經翻天覆地?
曾經有人响中環街市沿住扶手電梯上山,記錄沿途既風光,由商業區到平民區到豪宅區,一幅同清明上河圖一樣既香港人生態就呈現眼前,如果你同樣由中環坐電車去到銅鑼灣,沿途記低你睇過既品牌同商場,你會得出一幅點樣既圖畫?
不如我地將頭先既FF故事作一個小結
「報告!我地成功搵到遠古時期留低既攤檔,呢啲攤檔雖小,但好多都位處黃金地段,甚至係CBD名店租界內,佢地每一檔都有先天抵禦租金攻擊既護罩,如果我地將佢地大加發展,必能成為呢場對抗名牌既大戰既助力!」
香港人日日响度鬧地產吃人,超市霸權,但我地有冇反思下响呢啲霸權之間,有冇留底一條隙縫比我地透氣?响CBD周圍,有一檔檔零散既檔仔响度擺賣.响超市集團壟斷全港日常生活品銷售市場既時候,一啲零星既士多繼續响度默默經營,保住僅餘既陣地
士多會成為自護之殘光,定係對抗泰坦斯既奧干?
於中環某酒店旁經營的小檔
蘭桂芳旁經營的小檔
舖頭由小檔起家,繼而殺入商場的實例
你又有否想過香港真係有蔗渣既價錢,租燒鵝既舖位,去開始你既創業美夢?响寸金尺土既CBD內,搵到呢類型既小攤檔俾大家去發展,售賣你既貨物?你亦可以睇下呢啲小攤檔賣乜野,搵下除左百X,X康,同華X之外,仲有賣緊日常用品既舖頭,佢地响邊度,分佈係點,就等大家繼續留意呢度,或者你會度搵到你心儀既貨品,檔位,甚至同道中人!响呢個人人都話THIS CITY IS DYING既都市,搵到多一種既生存既方法!
没有评论:
发表评论